សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ត្បូងឃ្មុំ ៖ ជីរណា ជាពពួកបន្លែដែលមានស្លឹកទ្រវែង មានក្លិនឈ្ងុយប្រហើរ ដែលគេនិយមទទួលទានជាមួយម្ហូបអាហារបានច្រើនមុខ ឬធ្វើជាបន្លែផ្ទាប់ក៏រឹតតែមានឱជារស។ ក្នុងនោះ ការដាំដុះជីរណាក៏មានភាពងាយស្រួលដាំ មិនសូវរើសប្រភេទដី ហើយត្រូវបានគេនិយមដាំជាលក្ខណៈគ្រួសារ ក៏ដូចជាចំការធំៗសម្រាប់ផ្គត់ផ្គង់នៅលើទីផ្សារទាំងខួបប្រាំង និងខួបវស្សា។
លោក ខៀវ សុខឃឿន ជាសមាជិកបណ្ដុំអាជីវកម្ម និងជាអ្នកដាំជីរណាមួយរូបស្ថិតនៅឃុំទួលសំភី ស្រុកអូររាំងឪ ខេត្តត្បូងឃ្មុំ បានមានប្រសាសន៍ឱ្យដឹងថា ជីរណា គឺមានភាពងាយស្រួលក្នុងការដាំដុះ ហើយមិនខ្លាចខូចដូចបន្លែផ្សេងទៀតនោះទេ ជាពិសេសគឺអាចដាំបានគ្រប់រដូវកាល មិនថាខួបប្រាំង ឬខួបវស្សានោះទេ ពោលគឺឱ្យតែរៀបចំប្រព័ន្ធទឹកបានត្រឹមត្រូវ។
លោកបន្តថា ៖
“បច្ចុប្បន្នយើងដាំដុះលើផ្ទៃដីជិត ១ហិកតា ដែលអាចប្រមូលផលជីរណាប្រចាំថ្ងៃប្រមាណ ១០០គីឡូក្រាម ឬច្រើនជាងនេះ ហើយអាចលក់បានក្នុងតម្លៃ ២០០០-៣០០០រៀលក្នុងមួយគីឡូក្រាមផងដែរ។ សម្រាប់អតិថិជនវិញ ភាគច្រើនជាអាជីវករនៅតាមផ្សារ ដូចជា ផ្សារសួង អូររាំងឪ ព្រៃវែង ជាដើម ដែលទិញយកទៅលក់បន្ត”
ពាក់ព័ន្ធនឹងបច្ចេកទេសដាំជីរណា លោក សុខឃឿន បានរៀបរាប់ថា ជាដំបូងត្រូវភ្ជួរដី និងហាល ៤-៥ថ្ងៃ រួចធ្វើការប្រែដី និងហាលបន្ត ៥ថ្ងៃបន្ថែមទៀត ដើម្បីឱ្យដីងាប់មេរោគ ទើបលើកជារងដែលមានទទឹងប្រមាណ ១.២ម៉ែត្រ ហើយបណ្ដោយអាស្រ័យប្រវែងដី។ បន្ទាប់មកត្រូវធ្វើរងគ្របស្បៃដើម្បីការពារពន្លឺថ្ងៃ និងរៀបចំប្រព័ន្ធទឹកស្រោចស្រពតាមរងដំណាំ ទើបចាប់ផ្ដើមដាំ។
លោកបានបន្តថា ៖
“សម្រាប់វិធីសាស្ត្រនៃការដាំគឺយើងព្រួសគ្រាប់យកតែម្ដង ដោយសារជីដែលព្រួសគ្រាប់មានសភាពទន់ជាង និងដាំរយៈពេលខ្លីជាងជីដែលដាំដោយដើម ហើយអតិថិជនចូលចិត្តហូបជាងផងដែរ។ បន្ទាប់ពីព្រួសគ្រាប់ពូជរួចហើយ យើងត្រូវស្រោចទឹកបានឱ្យគ្រាប់គ្រាន់ដើម្បីឱ្យគ្រាប់ឆាប់ដុះ។ ក្រោយមក រយៈពេលប្រមាណ ២សប្ដាហ៍ គ្រាប់ជីនឹងដុះស្លឹកឡើង ហើយទុករហូតដល់ជីចាប់ផ្ដើមចេញស្លឹកតូចៗមក ទើបយើងធ្វើការសម្អាតស្មៅ ដាក់ជី ការពារសត្វល្អិត ប្រមាណ ៣ខែគឺអាចប្រមូលផលបានហើយ។ ការប្រមូលផលជីរណា យើងត្រូវដកដើមជីណាធំៗ ទុកកូនតូចៗឱ្យលូតលាស់បបន្តទៀត ហើយលាងសម្អាតដីដែលជាប់ឫស ចងបាច់ និងច្រកថង់លក់ឱ្យឈ្មួញតែម្ដង”
គួរបញ្ជាក់ដែរថា លោក ខៀវ សុខឃឿន បានចាប់ផ្ដើមដាំជីរណាប្រមាណ ៤ឆ្នាំមកហើយ ដោយដំបូងឡើយលោកជាឈ្មួញដើរទិញយកទៅលក់បន្ត លុះចាប់អារម្មណ៍នឹងការដាំក៏បានដើរមើលពីបច្ចេកទេសអ្នកដែលដាំមុនៗ និងចាប់ផ្ដើមដំបូងលើដីប្រមាណ ២០អាតែប៉ុណ្ណោះ។ លុះក្រោយមកទៀតក៏ចាប់ធ្វើការពង្រីកទីធ្លាដាំដុះបន្ថែម។ ដោយឡែក សម្រាប់ដើមទុនដំបូង លោកចំណាយអស់ច្រើនដោយសារតម្លៃគ្រាប់ពូជថ្លៃ និងចំណាយលើការរៀបចំរង ទិញស្បៃ ជាដើម ប៉ុន្តែនៅពេលបច្ចុប្បន្ននេះ តម្លៃគ្រាប់ពូជបានធ្លាក់ចុះបន្តិច ហើយលោកក៏មានគម្រោងពង្រីកការដាំដុះបន្ថែមផងដែរបើមានកម្លាំងជួយគ្រប់គ្រាន់៕
Account
Security
Favourite Content